انواع الصحاب والفرق بين الصاحب والصديق

تعالوا مع بعض نعرف انواع الاصحاب وايه الفرق بين الصاحب والصديق

_ اولا انواع الاصحاب :

اصحاب المصالح : وده اكتر نوع موجود فى الجامعه تبقى مثلا معروف فى الدفعه ان الولد ده شاطر وبيزاكر ومقطعالسمكه وديلها وتبقى فى يوم قاعد كده مع نفسك بتعمل اى حاجه تلاقى ده راح ناططلك وتكون لسه اول مره تشوفه ويسلم عليك ويبوسك ويحضنك وفى قاعده واحده ياخد نمرتك وطول مانتوا مع بعض فى الجامعه مايعبركش ولا يبص فى وشك الا لما يكون عايز منك حاجه ولو فضلت بتاع تلت اربع تيام مابتروحش الجامعه وهو عايز منك حاجه ينطلك فى التليفون ويوم الامتحانات يقولك ايه يازميلى ظبطنى بقى فى الامتحان احنا اسره واحده مع بعضينا ولما الاجازه تيجى ماتشوفش وشه ولا تلاقيه حتى بيتصل بيك يتطمن عملت ايبه فى الامتحان

اصحاب الكماله : والنوع ده انا شخصيا باعانى منه وهو كالاتى تتصاحب على حد فى الجامعه واول ماتتعرفوا قاعدتكوا كلها تبقى مع بعضكوا والاكل والشرب والحياه تبقى زى الفل وتيجى تكلمهم يدوك وش هادى كده ويعاملوك احسن معامله ولو غيبت عنهم يوم تلاقيهم سألوا عليك او اتصلوا بيك يشوفوك جاى النهارده ولا لا ويكلموك عن حاجات كتير تخص حياتهم وتبقوا جروب جامد اوى وكل واحد فيهم صاحب صاحبه اوى بس الموضوع ده مابيطولش لانهم اول مابيتعرفوا على حد جديد تلاقى بقى كل حاجه اتغيرت وتكون اتعلقت بيهم جدا تلاقيهم بقى ادوك وش خشب والمعامله تبقى زى الزفت وتلاقيهم مابياخدوش رأيك فى اى حاجه وكلامهم كله مع الناس الجداد دول ولو غيبت اسبوع مايسألوش عليك الا لما يشوفوك ويسألوا ويرجعوا تانى زى الاول ولو حد بقى من الناس الجديده اللى اتعرفوا عليهم سابهم او غاب عنهم ومافيش عنه اخبار تلاقيهم بيدوروا عليك

اصحاب تقضيه الواجب : وده بقى نوع غريب قوى مثلا انت اتعرفت على واحد فى الجامعه وطبعا فى بدايه التعارف بتقعدوا مع بعض شويه بعد كده كل واحد بيروح لحاله بس بتبقوا عارفين بعض يعنى كل يوم تشوفوا بعض تسلموا على بعض وازيك ازيك عامل ايه وبتاع وكل واحد يروح فى طريق واما تيجى تعزمه على فرح ولا عيد ميلاد يجى ده لو مانسيش وبعد البوفيه او تقططيع التورته يجى يقولك انا هامشى بقى عشان ورايا مشوار ومش عايز اتأخر ومايقولكش حتى كل سنه وانت طيب ولا مبروك وتانى يوم تقابله فى الجامعه ولا كأنه جالك فرح ولا شاركك فى مناسبه زى دى نوع غريب جدا

ثانيا الفرق بين الصاحب والصديق :

الصاحب : هو حد بتتعرف عليه اثناء فتره معينه من حياتك فى الجامعه مثلا بس علاقتكوا بتبقى عاديه بتخرجوا مع بعض اه بتاكلوا وتشربوا مع بعض ممكن تذاكروا مع بعض اوكى ممكن تحكوا لبعض عن تفاصيل حياتكم بس الاسرار بتبعدوا عنها بس المشكله اللى دايما بتحصل بين الصحاب ان ممكن لو خلاف كبير حصل بينهم او حد غلط ولو غصب عنه فى التانى يزعلوا من بعض ولو وصلت انهم مايكلموش بعض تانى عادى كل واحد فيهم يقول i don`t cear فى غيره كتير ولو رجعوا يكلموا بعض علاقتهم ماتبقاش زى الاول يعنى هاتبقى اقل بكتير من الاول

الصديق :اما الصديق ده بقى بيبقى موجود فى حياه البنى ادم مره واحده او اتنين بالكتير الصديق بيفهمك من عينيك من طريقه كلامك يقدر يميز اذا كنت مبسوط ولا زعلان ان كنت مبسوط يفرحلك ويبقى اسعد انسان فى الدنيا ولو كنت زعلان او عندك مشكله يبقى نفسه يحللك مشاكلك بكل جوارحه ومايهداش ولا يرتاحله بال الا لما انت ترتاح وتلاقيه اكتر واحد يخاف على مصلحتك هو الوحيد اللى تقدر تأتمنه على سرك هو الوحيد اللى تقدر تتكلم معاه فى اى حاجه بدون حرج لانك بتبقى فاهم انه عمره ماهايزهق منك هو الوحيد اللى تقدر توصيه وتأتمنه على اهلك لو انت سافرت او تعبت او او او هو الوحيد بعد اهلك طبعا الل بيقف جنبك فى ازماتك حاجات كتير اوى وماصفات كتير اوى موجوده فى الصديق

فى النهايه احب اقول انك لو لفيت الدنيا عشان تدور على صاحب هاتلاقى مليون صاحب وهاتلاقى اشكال والوان انما لو لفيتها عشان تدور على صديق هو واحد مافيش غيره

ههههههههههههه

واللة زيكوا عندو حق بجد نفض للدنيا وخليها تحت رجلك مش فوق دماغك يامان وقشطات