تيتو و نسرين (قصة رومانسية طويلة ) الجزء التانى

طبعا بشكركم يا جماعه علي متابعتكم للحلقه الاولي من الروايه ويارب تكون عجبتكم وانهارده بنقدملكم الحلقه التانيه من الروايه ويارب تلاقي نفس ردود الافعال الجميله اللي شفناها في الحلقه الاولي وتنال اعجابكم

الحلقه الثانيه

المشهد الأول

نسرين : الووو

تيتو : الووو

نسرين : ايوه ... تيتو ؟؟

تيتو : ايوه انا تيتو مين معايا ؟

نسرين : انا نسرين

تيتو : بجد ، ازيك يا نسرين ، متتصوريش انا مبسوط قد ايه ، والله مش كنت مصدق انك حتكلميني

نسرين : ممكن اسالك سؤال

تيتو : اه طبعا اسألي براحتك

نسرين : انت كنت متفق مع صاحبك ابراهيم انهارده صح ؟

تيتو : ها ..... مين قال كده ؟؟ ( عرق ووشه جاب الوان )

نسرين : مالاكش دعوه مين اللي قال ، حصل ولا محصلش

تيتو : اصل ... طيب ولو ده مثلا هو اللي حصل ، تزعلي ؟؟

نسرين : بص ولا اصل ولا بتاع انا متصلة عشان اقولك ان الحركة اللى انتا عملتها دى عيب اوى يعنى قصص وحاجات كدة

تيتو : حركة ايه بس اسمعيني ..، انا مكنتش اقصد اضايقك ..، والله انا كان نفسي بس اشوفك واتكلم معاكي

نسرين : مفيش اسمعينى واوعى تفتكر انى اتصلت عشان اكلمك لا انا اتصلت عشان افش غلى بس ( وقفلت السكه )

--------------------------------------------------

تيتو : عاجبك كده ياعم ابراهيم ادي اخرة شورتك

ابراهيم : ياعم شورتي ايه وفانلتي ايه ، ايه بس اللي حصل ؟

تيتو : ياعم اهي كلمتني اهي وكان ناقص تتف في وشي ، الست رحاب بتاعتك قالتلها اننا كنا مظبطين مع بعض واننا متقابلناش صدفه

ابراهيم : ياراجل !!! هههههههههههههههههههه راحت عليك يا معلم

تيتو : ياعم انت فرحان فيا !! ايه البني ادم ده ، تسمح تقولي ايه العمل دلوقتي ؟

ابراهيم : العمل عمل ربنا انا اعملك ايه يعني انا اللي اقدر اعمله عملته ، وبعدين سيبك منها دي بت معقده وتنكه ، عاجبك فيها ايه

تيتو : عاجبني فيها انها محترمه ، ايه مش كفايه

ابراهيم : محترمه !! ههههههههههههههههه انت عبيط يالا ، محترمة ايه وبتاع ايه وانت كنت بقي عرفت منين انها محترمة ضربت الودع ولا فتحت الكوتشينة

تيتو : لا مفتحتش الكوتشينه بس حفتح دماغك انت يا خفيف واتلم بقي علشان ملطشلكش

ابراهيم : ياعم وعلي ايه انا سايبلك القهوه وماشي ، عيش انت بقي مع ذكرياتك المؤلمه انا مروح ياعم بلا قلبة دماغ

تيتو : ياعم طب استني بس ...... ياد اهمد بقي تعالي هنا .... بجد والله عايزك بس تعالي

ابراهيم : ياعم عايزني في ايه ده انت كنت حتضربني من شوية خلاص احلويت في عنيك دلوقتي

تيتو : ياعم بقي ما تبقاش رخم اقعد بس وفكر معايا اصالحها ازاي ولا اتنيل اعمل ايه

ابراهيم : مش عارف بقي

ااااااه بس انا جتلي فكره بمليون جنيه

تيتو : ابوس ايدك الحقني بيها

ابراهيم : طب حتدفع حساب القهوه ؟

تيتو : ياعم حتهبب بس قول

ابراهيم : عارف البت رحاب دي كانت بتحب مين ؟؟

تيتو : وانا مال اهلي تحب اللي تحبه

ابراهيم : ياعم متبقاش غبي اصبر بس ، البت رحاب دي كانت بتموت في الواد مهاب فاكره ؟ ، الواد بتاع اسرة الزهرة

تيتو : ااااه عارفه ماله الواد ده .. ده كان ندل اوي ايام الكلية بس مشفتوش من زمان .. وبعدين ده ايه علاقته بالموضوع ؟ ....... اوعي يكون قصدك

ابراهيم : ايوه قصدي امال انت فاكر ايه . احنا نروحله نخليه يجي معانا يكلم رحاب يمكن تأثر علي صاحبتها ومظنش مهاب حيغلب فيها مانت عارفه مسهوك والبت اساسا بتموت فيه

تيتو : طب والواد ده نجيبه منين دلوقتي

ابراهيم : تعالي نروحله البيت انا عارف بيتهم ، قوم حاسب ويالا

-----------------------------------------------

المشهد الثاني

راحوا الاتنين علي بيت مهاب وندهوا عليه كان موجود ونزلهم وهات يا سلامات وترحيبات وفينكم وازيكم وايه اللي فكركم بيا وبعدين راحوا علي القهوه لما تيتو قال لمهاب انه عاوزه في موضوع مهم واتكلموا في السكه عن الموضوع

مهاب : اممممممم طب وانا ايه اللي يخليني اعمل كده حستفاد ايه يعني

ابراهيم : اعمل عمل انساني ياخي في اخوك الغلبان اللي انت شايفه ده

تيتو : ياعم شوف انت عايز ايه وانا حظبطك بس لو تعرف تنجز الحوار ده بجد

مهاب : ههههههههههههههههههه يابني الحوار ده مياخدش في ايدي ساعه زمن بس اقتنع بس الاول

ابراهيم : ياعم انت مقتنع اساسا ، بس انت اللي مش واخد بالك ، فكر بس نروح امتي ونعمل ايه

مهاب : طيب بصوا انا حكلمها في التليفون واحدد معاها معاد واحاول استخدم سحري وأأثر عليها

تيتو : ياعم انت حتعملي فيها هاني سلامه ما تلخص ياعم وكلمها دلوقتي

مهاب : معييش رصيد قوم هاتلي كارت شحن

تيتو : كارت شحن !! انت عبيط ياد

مهاب : هو كده ان كان عاجبك ، في صنايعي بيعمل شغل من غير عده ، مفيش طبعاً ، اهو كارت الشحن ده العده ، قوم يالا هات كارت من ابو 100 علشان الحوار كبير مش سهل

تيتو : كمان ابو 100 ياعم انا كنت رحت خطبتها ارخص ، نهايته امري لله

----------------------------------------------------------

راح جابله الكارت وشحن الموبايل وضرب مهاب النمره وانكمش في الكرسي وحضن الموبايل

تيتو : هو ماله بيعمل كده ليه ؟

ابراهيم : بيتقمص ، سيبه انت بس يشوف شغله

تيتو : ياعم بيتقمص ايه هو في ايه بالظبط

ابراهيم : ياعم متقرفناش بقي ، مانت مالاكش في التظبيط يبقي تسيب اللي بيفهموا يشتغلوا

مهاب : ( بصوت واطي جداااااا ) الو

رحاب : الو مين معايا

مهاب : معقول معرفتيش صوتي

رحاب : لو سمحت قول انت مين علشان مقفلش السكه

مهاب : خلاص حقول بس كنت متخيل انك عمرك ما حتنسيني ابداا ، انا مهاب ياتري فاكره الاسم ده

رحاب : مش معقوووووووووول ، مهاب انت فين واحشني اووي اوي بجد سالت عليك كل اللي يعرفوك ودورت علي نمرة تليفونك في كل حته ، انا بجد مش مصدقه نفسي

مهاب : ( ضحكه خبيثه وبيبص علي ابراهيم وتيتو وشغل الاسبيكر ) ايوه يا حبيبتي معلش انا مرت عليا ايام صعبه محبتش تشوفيني فيها ولما خلصت الظروف دي اول حد فكرت فيه هو انتي

رحاب : بجد يا مهاب انا مش مصدقه نفسي انا مش عارفه اقولك ايه ، انا نفسي اشوفك

مهاب : طيب تحبي نتقابل فين ؟؟ ، اجيلك الجامعه

رحاب : خلاص ماشي ، اي مكان بس اشوفك

مهاب : خلاص يبقي حجيلك بكره في الجامعه الساعه عشره

رحاب : انا مش حنام لغايه ما اشوفك

مهاب : ولا انا يا حياتي ، سلام بقي دلوقتي واشوفك بكره .. بااي

رحاب : بااي

----------------------------------------------------------

مهاب : ايه رايكم كده يارجاله شغل علي ميه بيضه اهو

تيتو : نهايته متخلنيش اتفتح فيك حنعمل ايه بكره

مهاب : نعمل ايه !! حدد كلامك .. انت مش حتعمل حاجه انا اللي حعمل ، ما تفهمه يابراهيم

ابراهيم : ايوه يا تيتو خلاص انت مالاكش دعوه بالموضوع ده غير لما نقولك تعالي ، سيبنا احنا نتصرف

تيتو : ياجدعان والله انتوا حتودوني في داهيه انا قلقان منكم

مهاب : وعلي ايه ياعم ، نفضها سيره وكل واحد يشوف مصلحته

ابراهيم : لا يا مهاب ميصحش ده برده اخونا ويهمنا مصلحته ، اهدي انت بس وانا حفهمه غلطه ، جري ايه يا تيتو هو يعني الراجل الحق عليه انه بيخدمك

تيتو : هو يعني بيخدمني لوجه الله ، ماهو خابط كارت ب 120 جنيه دلوقتي

مهاب : و100 جنيه تجيبهم علشان مشوار بكره ، ولا انا حصرف من جيبي

تيتو : لااااااااااااا ده مش اسلوب ده انت حتستغلني بقي ولا ايه

ابراهيم : خلاص بقي يا تيتو اديله خلينا نخلص

تيتو : امري لله ، خد 100 زفت اهو

مهاب : طب شوف حساب القهوه بقي وخليك علي اتصال علشان اقولك ايه الاخبار ، ومتقلقش كله حيبقي تمام

----------------------------------------------------------

مشي تيتو وابراهيم وفي السكه كانوا بيتكلموا .......

تيتو : ايه الواد ده اعوذ بالله ، منشااار ، بتحب فيه ايه العبيطه دي

ابراهيم : ههههههههههههههههههه بحب سهوكته ، مانت عارفه يقعد يسرح ويسبل لغايه ما البت تحبه وتموت فيه ، سيبك انت بس هو الواد ده اللي حيجيب من الاخر

تيتو : علي الله كله ، انا حاسس ان خراب بيتي علي اديه

ابراهيم : هههههههههههههههههههه ياعم خير انشاء الله بس متشيلش هم انت ، يالا بقي اسيبك بقي انا واروح انام انا هنجت خلاص

تيتو : وانا كمان معدتش شايف ، اطلع اناملي ساعتين علشان اروح شغلي بكره ، يالا تصبح علي خير

ابراهيم : وانت من اهله ، بس متنساش تبقي تكلمه اخر النهار تشوف عمل ايه

تيتو : خلاص ياصاحبي ، سلام

ابراهيم : سلام

-------------------------------------------------------------------------

شكر خاص لضيوف الحلقه
ابراهيم

مهاب : PEPSI

رحاب

فكرة واخراج
Tito

سيناريو وحوار
Tito

وأشوفكم في الحلقه الجايه

عايز اشوف احلى ردود لأحلى اعضاء

و عايز اعرف مقترحاتكم للحلقة اللى جاية ان شاء الله

بجد حلوة يا معلم
بس ياريت تنزل القصة كلها مرة واحدة
عشان نقدر نحكم عليها صح
ومعلش انا ليا تعقيب بسيط
انا اعرف مهاب وهو مبيقعدش على قهوة
وكمان مش استغلالى للدرجة دى
هو جدع وبيعمل اللى انت عايزه
بس مش لدرجة الاستغلال

حلوه جدا بس الحلقه احداثها قليله وبعدين هما كام حلقه اوعي يكونوا 30
والله اقتلك نسرين
بس جامده نايس ياتيتو

شكرا على الرد يا قيصر
و عايز اقولك انى كمان اعرف مهاب و ممكن اكون عارفه اكتر منك
و مهاب مش استغلالى ابداااااااااااااااا
بس انا حبيت اروش فى القصة
و بعدين مهاب احسن شخص كانت تليق عليه الشخصية ديه من الاسرة
و بالنسبة للقصة
اعتقد صعب انها تنزل مرة واحدة علشان انا لسه مخلصتهاش
و كل ما يبقى ليا مزاج شوية بعمل جزء
اوك يا جامد

ميرسى على ردك يا مى

و متخافيش القصة مش هتبقى طويلة اوى كده
ان شاء الله اخليها 22 جزء بس
و يا ستى ربنا يخليكى لينا
و تقتلي كمان و كمان
هههههههههههه

شكرا اوى ياتيتو وبجد القصة حلوة وكمان كلام قيصر صح جدا لانى مش استغلالى ولا حاجة بس مش مشكلة انك بهدلتنى كدة اوى بس بجد القصة حلوة اوى وانا تحت امرك بس خلى بالك لاخد منك نسرين

على فكرة تيتو ايبقى ولا نخليها قدام شوية

تيتو اجمل صاحب ممكن اى حد يقابلة واحسن حاجة فية انة جدع اوى وراجل اوى مع اى حد ومستنين الجزء التالت بس فى الانجاز ياتيتو

ميرسى على الرد يا مهاب يا جامد

و شكرااااااااااااااااااااااااا على الكلام الجامد اوى ده

ايه يا تبتو يا جامد الحلقة جامدة جدا اينعم هي صغيرة بس حلوة وعلى فكرة مهااب اة مش استغلالي للدرجادي وساعات ليه حركات جدعنة وانت يا تيتو زي ما مهاب قالك اخ جدع جدا جدا وتمام ومستنيين الحلقة الجاية
سلامو عليكو

ربنا يكرمك يا عمر يا حبيبى

و ميرسى كتييييييييييير على الرد يا اوروبى

و يا رب نشوفك كده متهنى باللى بالى بالك

قصة حلوة اوى يا تيتوا

مستنين الجزء التالت

دائما انت فى تالق

وعلى فكرة مهاب فعلا استغلالى كدة
هههههههههههههههههههههههههههههههههه

متشكرين يا حودة و مستنين مواضيعك المتميزة

بجد يا تيتو انت فنان القصه حلوه مووووووووووووووووووووووووووت ياريت تكملها
ياتيتو ياجامممممممممممممممممممممممممممممممد

متشكرين يا سوكا على الرد الجامد اوى

و عايزك بقى تقوليلى ايه فكرك فى الحلقة الجاية و ادخل مين فيها

ولعة ياعم تيتو بس ياجدعان احنا ممكن نعمل قسم الفنون الجميلة الزهراوية وتبتدى الناس تعمل قصص جميلة زى اللى تيتو بيعملها وعلى الاقل نرجع تانى زى الاول وعلى فكرة انتوا اجمد زهراوية فى الدنيا

مرسى ليك يا تيتو وتسلم ايديك على الجزء التانى من القصة بس هو صغير شوية بس جميل اووووى ومستنين منك بقى بقيت الاجزاء بتاعت القصة ديه وربنا يوفقك ويوفقنا جميعا

اجمل ما فى الرد هى الدعوة

تقبل الله منا و منكم
و خلينا نسمع اخبارك بقى

خلصنا بقة ياعم تيتو وكمل الجزء التالت

و الله العظيم يا هوبا انا برجع من الشغل مش شايف قدامى 2 سنتيمتر

و بعدين انتا عيل جزمة و الله و بقية الاسرة كمان
ابقوا اسألوا علشان ابقى اسأل و اقدر بعد كده

و حشتنى قعدتنا الحلوة يا معفن

عيد ميلادى كان امبارح و المنتدى كله عارف و لا حد سأل و لا حتى عبرنى

كده فيه واحد
ههههههههه
قابل و قعد