تيتو و نسرين (قصة رومانسية طويلة )احلى مواضيعى:عايز ردود:

شباب الزهرة للانتاج السينمائى تقدم

الدنيا ولاد وبنات بطولة

هو : تـــــــيتــــــــو هى : نســـــريـــــن الحلقة الاولى المشهد الاول
تيتو شاب زى اى شاب اتخرج من الجامعة واشتغل بيصحى كل يوم يروح شغله يرجع يقعد مع صحابه ضحك،خروج هزار،شاب وبيعيش سنه لغاية ما فى يوم كان عنده مشوار،قام الصبح لبس هدومه وخد حاجاته ونزل ،ركب المترو_اخيرا لقى كرسي فاضى ،غريبه اوى اول مرة تحصل، حتى هو استغرب،فتح كتاب وقعد يقرا، فاتت محطة وفاتت التانية والتالتة دخلت مجموعة كبيرة فيهم بنت رقيقة شكلها مستعجلة اوى بس ملامحها هادية بص حواليه مالقاش مكان فاضى و

هو:تعالى يا انسة اتفضلى اقعدى
هى:ميرسي

وسع يا استاذ لو سمحت شوية خلى الانسة تقعد

هى:انا اسفة اوى انى قومتك ممكن تدينى الحاجات اللى شايلها اشيلهالك

هو:بس كدة هتعبك

هى:لا لا مفيش حاجة

طيب خدى الكتب دى وانا هشيل اللاب توب

خدتهم وحطت كتبها فوقيهم، هو طبعا بفضول تقليدى بص على الكتب يشوف هى ايه لاقاها كلها بالانجليزى و.............

هو: انتى كليه ايه

هى: انا اداب انجليزى

هو:امممممم هايل ف سنة كام بقا؟ على فكرة انا خلصت تجارة من سنتين

هى: وانتا بتسأل ليه؟

هو:لا عادى يعنى اصلى شايفك رايحة الجامعة بدرى و مستعجلة زى بتوع سنة اولى بس الكتب بتقول غير كدة

هى: امال بتقول ايه الكتب ؟

هو:انتى شايلة كذا كتاب وشكلهم مكلكع اوى على سنة اولى-ابتسامة

هى:لا ابدا دى اصلا روايات مش كتب عشان كدة حجمها كبير

هو:معقول انتى مهتمة بالقراية؟؟ قليل اوى البنات اللى بتحب القراية

هى:لا دى روايات بدرسها بس اه انا بحب القراية

هو:انا كنت زمان غاوى بس خلاص بقا من بعد الجامعة والواحد اشتغل وما بقاش فاضى
الا صحيح انتى اسمك ايه؟؟

هى:نعم ليه يعنى يهمك ف ايه؟

هو:لا يعنى انا اسف لو ضايقتك بس يا ريت اعرف

هى :يعنى انتا بتقول شفت الكتب اعتقد الاسم قدامك كمان

هو: ايه ده معلش العتب على النظر
بس اسمك جميل اوى يا نسرين ،انا تيتو،فرصة سعيدة اوى

هى:امممم انا كمان

هو:ممكن سؤال

هى:اتفضل

هو : انتي بتقعدي في كافتريا ايه في الجامعه ؟

هي : مش بقعد ف كافتيريات

هو : ليه امال بتقعدي فين بين المحاضرات

هي : بقعد ورا مبنى القسم بتاعى مع صحباتى

هي :هو في بنات لسه كده ده البنات بقت تشيش دلوقتي

هي : نعم ... طيب عن اذنك عشان محطة الجامعة جت
هو : طيب بس ثانية واحده يا ....يا انسه

هي : نعم اتفضل

هو : ممكن نمرة الموبايل لو مفيهاش احراج انا بجد مبسوط اني اتعرفت عليكي وياريت نبقي اصحاب

هي : بس انا مش عايزة نبقى صحاب انتا قومت وقعدتنى وانا متشكرة اوى وخلاص
هو :ليه بس كده انا والله مقصدش اضايقك
بس بجد انتي انسانه رقيقه ويهمني نبقي اصحاب
صدقيني حتكسبي صديق كويس

هي :لا ما ينفعش
هو : خلاص براحتك ... انا اسف لو ازعجتك واتمني ان الفرصة دي تتكرر تاني
ممكن اقول لااله الا الله ولا حتضايقي برده

هي :لا انا مش متضايقة محمد رسول الله
هو :ميرسي بجد وفرصة سعيده اوي ، باااي
هي : باى

-----------------------------------------

المشهد الثاني

كمل تيتو مشواره وهومش قادر ينسي نسرين ، شعور غريب جواه انها مش صدفه عاديه انهم يتقابلوا ، بس هي معبرتوش بالبلدي زي ما بيقولوا
ومدتلوش فرصة حتي يعرف نمرة الموبايل ، دماغه صدعت من كتر التفكير ، اخر ما زهق قرر انه يروح يقعد في اي كافيه يريح دماغه ويشرب حاجة وبعدين قال يكلم انتيمه ابراهيم يقابله ف الكافيه ، حاسس ان دماغه فيها 100 الف حاجة وعايز يفضفض واتفق مع ابراهيم يقابله بعد ساعة في الكافيه اللي دايماً يتقابلوا عنده و ...

ابراهيم : سلامو عليكو .. ايه يا بني قاعد بقالك كتير
تيتو : لا ابدا انا لسه جاي من ربع ساعة
ابراهيم : انا بقالي ساعة مش لاقي حتة اركن فيها كان لازم يعني يا اخي تجيبنا وسط البلد الساعة 3
تيتو: اصلها حلوة اوي يا هيما
ابراهيم : هي مين دي ياد ؟؟ وسط البلد !!
تيتو: وسط البلد ايه يا بني
ابراهيم : امال ايه ياعم ، اااااااااه السرحان ده وراه ايه يا معلم ، انا من الاول قلت في حاجة ، قول يا سيدي اشجيني
تيتو : بنوته زي السكر يا ابراهيم حاجة كده تحفه حلاوة ايه ورقة ايه ولا عنيها يا خرابي علي عنيها
ابراهيم : ودي جتلك في الحلم ولا شفتها في فيلم اجنبي
تيتو: يا اخي انت مش حتبطل هذارك البايخ ده ، قابلتها في المترو الصبح يا سيدي
ابراهيم : اوباااا ، ده الكلام جد بقي ، احكيلي يابن المحظوظة عملت معاها ايه بقي ظبطت ولا ايه
تيتو: ظبطت ايه يااهبل ده انا لولا اسمها كان مكتوب علي الكتاب مكنتش عرفته
ابراهيم : ههههههههههههه اه يا خيبتك ، منا علامي متمرش فيك ، اه يا خيبة املك في ابنك يا ام تيتو
تيتو : يووووه يأم هذارك الرمة ده انا حسيبك وامشي انا جزمة قديمة اصلا انى حكيتلك حاجة
ابراهيم : طب بس بس اهدي في ايه ياعم انت حتاكلني ولا ايه ، معرفتش حتي في كلية ايه ساكنة فين بتقعد في انهي حتة
تيتو : هي في رابعة اداب انجليزي ده كل اللي اعرفه ، اه وبتقول انها بتقعد ورا المدرج مع صحباتها بين المحاضرات
ابراهيم : استني استني هي جامعة ايه القاهرة ولا عين شمس
تيتو: القاهرة : يا ابن الايه يا مبخت ده انا كل حبايبي في اداب القاهرة ، طب واللي يقعدك معاها يا بوب تعمله ايه ؟
تيتو: اديله علي دماغه ، انت بتتكلم جد ولا بتهذر ، بص المسائل دي مفيهاش هجص
ابراهيم : يا جدع والله كلهم اصحابي ، ادعي بس متطلعش واحدة من اللي كنت انا ماشي معاهم وخلعت احسن تبقي غفلقت عليك ههههههه
تيتو : فشر ، تمشي معاك انت يا صايع ... دي ملاك يا بني
ابراهيم : ملاك ههههههههه طب يالا قوم حاسب ياخويا خلينا نروح ، قال ملاك قال ، الواد ده شكله عبيط ولا ايه

------------------------

دخل تيتو وابراهيم الجامعة ، تيتو قلبه بيدق مش عارف ليه مخضوض ، اعصابه متوتره شوية وبيحاول يهدي نفسه

تيتو : انا خايف ياد يا ابراهيم احسن تصدني زي المرة اللي فاتت
ابراهيم : تعالي نروح نجيب ساندوتشين انا واقع من الجوع
تيتو : يا اخي انت مبتحسش بقولك خايف وقلبي بيتنفض
ابراهيم : وانا مال أمي انا بخوفك ده منا جاي اظبطلك المصلحة اهو، هو انا سايب شغلي وجاي معاك علشان تقولي انك خايف ، المهم بقولك انا جعان
تيتو: طب يالا بس نروح عندهم ان شالله حتي اشوفها وخلاص
ابراهيم : طب تعالي ولو شفتها شاورلي عليها من بعيد واوعي هي تاخد بالها
تيتو: طب ايه رأيك تيجي نشوف الجدول بتاع محاضراتهم ايه وحنعرف هي فين دلوقتي
ابراهيم : اه يابن الناصحة تعالي انا اجيبلك الجدول

-------------------------------

ابراهيم : يا تيتو دي حتخرج من المحاضره خلاص ، تعالي نلحق بقي نروح علشان تشاورلي عليها ، مستعد
تيتو : مستعد ياعم هو انا رايح احارب ، استر يارب
ابراهيم : ابتدينا بقي شغل الحرامية ، ياعم انت مالك مرعوش كده ليه ده انت لو حتظبط نانسي عجرم كان أسهل

تيتو: اهي يالا ،، شايفها اللي لابسة تونك تركواز وجنبها بنت لابسه بدي اسود هناك اهم
ابراهيم : يابن الايه دى مزة ياد بجد ما تفوتها يا حمادة واظبطك انا مع واحدة تريحك
تيتو : بطل غلبة بقي وشوف حتعمل ايه
ابراهيم : ولا حاجة انت عارف مين اللي واقفه معاها دي ؟
تيتو : مين ؟
ابراهيم : دي رحاب كانت من الشلة بتاعتنا ، انت حظك في رجليك دول مش حياخدوا غلوة ، بص انا حدخل عليهم اعمل الواجب واخدهم علي الكافيه بره وانت تجيلنا علي هناك كمان ربع ساعة ، المهم تختفي دلوقتي ومشوفكش غير كمان ربع ساعة ، ماشي يا عمنا
تيتو :، ماشى وربنا يستر ،اوعى تقل ادبك ياابن اللذين انا عارفك،

ابراهيم : انت لسه واقف يالا زق عجلك

----------------------------------

ابراهيم : هاااااااي ازيكم يا بنات
رحاب : هااي ازيك يا هيما عامل ايه فينك بقالك كتير مش بتيجي الجامعه
ابراهيم : معلش بقي مشاغل ايه انتوا بتعملوا ايه هنا ماتيلا نروح الكافتريا بدل قعدتكوا علي الرصيف
رحاب : نسرين ده بشمهندس ابراهيم كان زميلنا في الجامعه بس هو اتخرج ، ودي نسرين يا ابراهيم
ابراهيم : فرصة سعيدة اوي يا نسرين
نسرين : اتشرفنا
ابراهيم : طب ما تيالا نروح الكافيه نشرب حاجة انا نسيت قعدة الارصفه دي من زمان ممكن تنورينا يا نسرين ؟
نسرين : امممم ممكن بس عندى محاضرة كمان ساعة
ابراهيم : اوكي انا مش حقعد اكتر من كده ، ساعه واحده كفايه يالا يا جماعه

--------------------------------- -المشهد الثالث

راح ابراهيم ورحاب ونسرين الكافيه وقعدوا يتكلموا شوية ، رحاب بتسأل ابراهيم اخبار شغله ايه وهو بيسألها اخبار الجامعه ايه ، كلام عادي ، نسرين مبتتكلمش
وفجأة بيدخل تيتو المكان ، نسرين حتبص باستغراب وحتميل علي صاحبتها تقولها يا خبر !! شايفه الولد اللي جاي هناك ده ، هو ده اللي انا كلمتك عنه انه كان عاوز يكلمني اول امبارح ، و ...

تيتو : هيمااااااااااااا حبيب قلبي ، ليك وحشه يا راجل ( وااخدين بعض بالحضن واخر اشواق )
ابراهيم : ههههه تيتو باشا فينك يابني ، هو انا مشوفكش الا صدفة ولا ايه تعالي اقعد ، استني اما اعرفك ، رحاب و نسرين رابعة اداب ، ده البشمحاسب الاخصائي بتاع الشلة يا جماعة تيتو الجامد

تيتو : فرصة سعيده اوي يا جماعه يضايقكم لو اقعد معاكم ؟
رحاب : ( بصت لنسرين وبعدين بصت لتيتو ) لالالا ابداً اتفضل يا تيتو
تيتو: طب والانسة نسرين ممكن اقعد ولا ..
نسرين: اتفضل
تيتو ميرسي ( وجاب الكرسي وقعد جنب نسرينابراهيم : حتشرب ايه يا حماده ، بس بلاش شيشه علشان معانا بنات ههههههههه
تيتو : لا ياعم شيشة ايه ، ممكن اخد قهوة مظبوط ، المهم اخبارك ايه والدنيا عامله ايه معاك
ابراهيم : والله الحمد لله ( موبايله يرن ) ... طب بعد اذنكم يا جماعة حرد بس علي الموبايل

قام ابراهيم مشي بسرعة يرد علي الموبايل ، فضل تيتو ورحاب ونسرين التلاته بيبصوا لبعض ومحدش بيقول ولا كلمة ، فجأة موبايل رحاب بيرن و ...

رحاب : الوو ... ايه ؟ ............ طيب طيب اوكي جايه علي طول
بعد اذنكم يا جماعة دقيقه وجاية
تيتو : رايحة فين يارحاب استني انا جايه معاكي
رحاب : لالا استني انا جاية علي طول دقيقه بالظبط وجايه

مشيت رحاب ، مبقاش فاضل غير تيتو و نسرين، مشهد صمت تقليدي في المواقف اللي زي دي ، استمر الصمت دقيقتين عدوا علي الاتنين كأنهم سنة ، و...

تيتو: ( بيبص في عنيها ) يعني بتقعدي في كافيهات اهو ؟
نسرين : ( عنيها في الارض ) نعم .. لا انا بس جيت علشان صاحبتي
تيتو : والله صاحبتك فيها الخير ، يعني لولا هي صاحبتك انا مكنتش عرفت اتكلم معاكي تاني
نسرين: وانت عايز تتكلم معايا تاني ليه
تيتو : يعني مش عارفه ليه ؟
نسرين : لا والله مش عارفه ، انت ليه بقي عايز تتكلم معايا ؟
تيتو : اصل ... طيب خلاص
ولا اقولك لا مش خلاص ، فيها ايه لما تديني فرصة نتعرف علي بعض ، انا من اول ما شوفتك وانا حاسس اني حخسر كتير لو متعرفتش عليكي
نسرين: انا مش فاهمه انت عايز ايه بالظبط
تيتو: طيب ممكن اسألك سؤال
نسرين : اتفضل
تيتو : هو ده لون عنيكي ولا دي لينسز ؟
نسرين: لاء لون عنيا
تيتو : يبقي دي اجمل عيون انا شفتها في حياتي ، حد يشوف العيون دي وميتمناش انه يفضل يبص فيها علي طول
نسرين : ( مكسوفة جدا وودت وشها الناحية التانية بابتسامة جميلة
تيتو : شكلك حلو اوي وانتي مكسوفة ، اعتبر الكسوف ده رضا ؟؟ ...... يبقي رضا

فجأه وفي عز اللحظة اللي اندمج فيها بيوصل ابراهيم ورحاب ، تيتو من جواه عايز يقوم يخنقهم بس ماسك نفسه و ...

ابراهيم : معلش يا جماعة اتاخرت عليكم كان تليفون مهم
نسرين : ايه يارحاب كل ده كنتي فين
رحاب : معلش يا نسرين والله حكم القوي حبقي احكيلك بعدين
تيتو: ايه يا هيما والتليفون بتاعك ده خلص قوام قوام كده
ابراهيم : بيضحك ويقول هو خلص بس لو عايزني اكلمه تاني اكلمه
تيتو: لا ياعم بعد ايه الله يسامحك بقي

تيتو: ايه يارحاب مش يالا بقي علشان المحاضرة معلش يا جماعة لازم نمشي علشان نلحق المحاضرة
تيتو: ( بيبص لنسرين ) طيب حنشوفكم تاني ؟؟
رحاب : اه طبعاً اكيد ، فرصة سعيدة يا تيتو

تيتو : طيب نسرين ممكن كلمة صغيرة ؟
نسرين : ( بتبص لرحاب ومتردده ) اه ممكن طبعاً ،تيتو : ممكن اخد نمرة الموبايل ؟ اظن بقي احنا بقينا اصحاب
نسرين: لا مش ممكن
تيتو: ليه بس
نسرين: انا مش بدي نمرة موبايلي لحد حتي لو من اصحابي
تيتو: طب اعتبريني حالة خاصة ، انشالله حتي تعامليني معاملة اطفال ، المهم تديني النمرة
نسرين: طيب مليني نمرتك وانا حبقي ارن عليك
تيتو : 0129914628
نسرين : طيب حبقي ارنلك باي بقي علشان الحق المحاضرة
تيتو : بااي

------------------------ -المشهد الرابع

رحاب : ( بتبص لنسرين وهما ماشيين ) هو في ايه ؟ ايه الموضوع بالظبط
نسرين : ( بصت لصاحبتها زي المتهمين ) موضوع ايه في ايه
رحاب : موضوع تيتو وابرهيم اللي سربني
نسرين : ( بتبص باستغراب ) سربك ازاي يعني
رحاب : انتي هبله يا بنتي انتى فاكرانى بجد قمت عشان اعمل حاجة ولا التلفون اللى جالى ده من مين ، ده كان ابراهيم بيقولى قومى وتعالى عايزك ف حاجة لما روحت بقوله فى ايه قالى مفيش بس تعالى نتمشى كدة لغاية علوم ونرجع
قلتله بس احنا كدة هنسيب نسرين لوحدها مع صحبك
قالى وهو المطلوب قلتله ازاى يعنى قالى بصى صاحبى معجب بصاحبتك وعايز يتكلم معاها فهمتى
قلتله ابراهيم انت بتستهبل ، قالى ايه انتى فكراه هياكلها لا ما تقلقيش ده محترم

نسرين : ااااااه بقي كل ده حصل انا حتصل بيه دلوقتي واخرب بيته
رحاب : تتصلي بمين ؟
نسرين : بتيتو
رحاب : ايه ده انتي لحقتي حفظتي اسمه وخدتي نمرته
نسرين : وانا اعمله ايه يعني هو اللي فضل يرزل علشان اخد نمرته ، قلت اخدها واريحه ، والله مكنتش ناويه اتصل بيه بس مادام طلعوا متفقين سوا انا حتصل بيه اهزأه

------------------------------------

-------------------------
----------------------------------- -شكر خاص لضيوف الحلقه

:رحابفكرة واخراج
تيتو الجامد
سيناريو وحوار
تيتو الجامد

ونشوفكم في الحلقه الجايه ابطال القصة حقيقين لكن احداثها مختلفة و نسرين كانت حبيبتى و ان شاء الله الجزء التانى هنزلو قريببس انا عايز اشوف احلى ردود Tito

انتة جزمة ياض متكمل بقيت الحكاية جامدة اوى يابنى واللة انا عايز اسمع بقيتها ولازم اعد معاك فى الكلية تحكيهالى جامندة جدا ياواد

اشطة يا هوبا يا جامد
الحكاية ديه ليها بتاع جزئين كمان
و انا محضر منهم الجزء التانى بس
و مستنى احلى ردود من المنتدى علشان اكمل الحكاية

و ان شاء الله هنزله على بكرة او بعد بكرة
بس مستنى الناس تقرا الجزء ده كويس
و شكرا ياض على الرد
و ماتنساش القسم بتاعى بعد الامتحانات

عنيا ياباشا وانتة تؤمر ياجميل

الامر لله وحده يا صاحبى

و كفاية عليا انك عارف معزتك عندى

ايييييه الرخاااااااامه دي يعني بعد اما الواحد كان اندمج مع القصه تقطعها كده
ده انت عامل زي الاعلاناات اللي في نص الافلاام
بس ياللا الحق نزل باقي الاجزاااااااااء قبل الامتحانات
علا فكره ده جاامد موووووووت

ايه ياتيتو
فيها ايه طيب اما كنت تطول شويه
بس القصه جامده جدا عاش

شكرا على ردك يا مى و كمان مبسوط ان القصة عجبتك اوى كده

و بعدين انا عملتها اجزاء علشان هى طويلة شوية
و ده اجمد جزء فى البداية

و انا شاء الله الجزء التانى هينزل قبل الامتحانات

بس لو الموضوع عجبكم بجد عايز عليه احلى ردود و قولى لكل صاحباتك عليه علشان يردو
اوك يا جمييييييييييييييييييييييييييييييل

اشطة يا بيدو يا جامد

نايس ان القصة عجبتك اوى و عايز منك احلى ردود و قول للعيال اصحابك يدخلو و يقروها علشان يتعلموا
ههههههههههه

و عاش يا وحش
و ابقى العب حديد شوية مادام تعرف ( عاش )

اوك
بس انا عايزه اعرف يعني ايه عاش اللي انتوا بتقولوا عليها دي

كلمة تشجيع عادية بس بتزود الحماس عند الشباب

و ديه بنقولها فى صالة الحديد و احنا بنلعب مع بعض

مش قصدى انا و بيدو
بتكلم عامة لما كنت بلعب حديد

مرسى ليك يا تيتو على القصة الحلوة اوووى ديه فعلا قصة جامدة مووووووووت بس معلش يعنى سورى انت رخم اوى علشان مكملتهاش

شكرا يا اية على ردك
بس انتى فين من زمان بقالنا كتير مشفناش ردودك الحلوة

ان شاء الله الجزء التانى هينزل قبل الامتحانات

و ربنا يسهل

بجد انا عايز منكم احلى ردود علشان عايز انزل الموضوع ده فى لوحة شرف المنتدى

نايس ياتيتو
قصة جامدة اوى
باين عليك بتحب تأليف القصص
ننتظر الحلقة التانية
وقصص جامدة زى دى
بس ياريت تقولنا الاحداث الحقيقية اللى حصلت بينك وبين نسرين

ميرسى اوى على ردك يا قيصر

بس مش هينفع اقولك الاحداث الحقيقية
معلش مش بحب اعرف خصوصياتى للناس اعذرنى فى كده

و يا رب تكون القصة حلوة لكل الناس

ايه الجمدان ده يا تيتو والبصحف معلم بس حرام عليك قعدت تكتب تكتب في القصة وفجأة تقول نلتقي في الحلقة القادمة ماعلينا بس انا مستني الحلقة القادمة يا تيتو بس متأخرهاش أكتر من كدة

طب روح ذاكر و بعد الامتحانات تبقى تكلمنى

ههههههههه

ياد ديه حاجة اسمها التشويق
و ان شاء الله الجزء القادم قريب اوى
اخوك تيتو

ماشي يا تيتو يا عم المشوق افضل انت موضوع ورا موضوع شوق في الناس كدة لغاية ما... ولا بلاش مستني الحلقة

طب خليك مستنى و انا معاك
المشكلة كلها انا مش عايز انزل الجزء التاى غير لما اخلص منها مرة واحدة
علشان ابقى انزل كل جزء فى ميعاد ثابت
فهمتنى
ما انا ممكن انزل الجزء التانى و استنى بق عقبال ما اكتب اى حاجة جديدة فى فترة الامتحانات ديه

كله بالرواقة يا نجم

جاااااااااااااااااامده
مووووووووووووووووووووووووووت
يا مـــــــــــــــــــــــــــــــــــــــــــــــــــــــان

والله ينور عليك بجد بجد بجد تسلم ايدك

ربنا يكرمك يا عبده
و يا ريت تكون عجبتك
و ايه رأيك تفكر تكون نهايتها ايه معايا و انا اعملها

ايه ياعم الحلاوه دى حلو اوى بجد

ميرسى على الرد يا سوكا

شكرا ليك يا تيتو
وبجد الفصه جامد بس يا ريت متاخرش بالجزء التانى
ونهايتها زى منت شايفوا يا مان حتبقى حلوه علشان انت الى كاتبها
بس هى اكيد لما ح يرتبطوا لو حتتفشكل الحكايه
ولا ايه؟

شكرا على ردك يا زيكو

و ان شاء الله هنزل الجززء التانى النهاردة

و معلش انا اسف على التأخير بس علشان ..........................